A wilderness traveler reaches for water while remembering sanctuary worship and resting safely by night

स्तोत्रसंहिता 63

Biblica® मराठी समकालीन स्वतंत्र संस्करण

अध्याय सारांश

स्तोत्र 63 कोरड्या वाळवंटातील शारीरिक तहानेला देवासाठीच्या तीव्र तळमळीत बदलतो. आठवलेला पवित्रस्थानाचा गौरव, मध्यरात्रीचे मनन, आणि निवारा देणारी काळजी उपासकाला विपुलतेपेक्षा खोलवर तृप्त करतात आणि आनंदी स्तुती जागृत करतात.

तळमळउपासनातृप्तीरक्षण

1हे परमेश्वरा, तुम्ही माझे परमेश्वर आहात, मी तुमचा कळकळीने शोध करतो; या कोरड्या आणि वैराण भूमीत माझा जीव तुमच्यासाठी तहानलेला झाला आहे; माझे सर्वस्व तुमच्यासाठी किती उत्कंठित झाले आहे.

2तुमचे सामर्थ्य आणि गौरव मी तुमच्या पवित्रस्थानी पाहिले आहे.

3कारण तुमची प्रीती जीवनाहून उत्तम आहे, माझे ओठ तुमचे गौरव करतील.

4माझ्या जिवात जीव आहे तोपर्यंत मी तुम्हाला धन्यवाद देईन आणि माझे हात तुमच्या नावाने उंच करेन.

5उत्कृष्ट भोजनाने व्हावे तसा मी तृप्त होईल; गीत गाणार्‍या ओठांनी मी तुमची स्तुती करेन.

6माझ्या बिछान्यावर मी तुमचे स्मरण करतो; रात्रीच्या प्रत्येक प्रहरी मी तुमचे मनन करतो.

7कारण तुम्ही माझे साहाय्य आहात, तुमच्या पंखांच्या सावलीत मी गीत गातो.

8मी तुम्हाला बिलगून राहतो; तुमचा उजवा हात मला सावरून धरतो.

9जे मला मारू इच्छितात त्यांचा नाश होईल; ते पृथ्वीच्या खोल रसातळी जातील.

10तलवारीच्या धारेने ते पडतील; कोल्ह्यांचे ते भक्ष्य होतील.

11परंतु राजा परमेश्वरामध्ये उल्हास करेल; जे लोक परमेश्वराची शपथ घेतात, ते सर्व त्याचे गौरव होईल; परंतु लबाडांची तोंडे बंद होतील.

‹ स्तोत्रसंहिता 62 स्तोत्रसंहिता 64 ›

Biblica® मराठी समकालीन स्वतंत्र संस्करण — CC BY-SA 4.0. Where these translations come from.