Families from many nations share a rich harvest and praise together beneath a bright peaceful sky

സങ്കീർത്തനങ്ങൾ 67

Biblica® സ്വതന്ത്രം സമകാലിക മലയാളവിവർത്തനം

അധ്യായ സംഗ്രഹം

സകല ജാതികളും ദൈവത്തിന്റെ രക്ഷാമാർഗം അറിയേണ്ടതിനു ദൈവിക അനുഗ്രഹത്തിനായി സങ്കീർത്തനം 67 അപേക്ഷിക്കുന്നു. നീതിയുള്ള നടത്തിപ്പു ജനങ്ങൾക്കു സന്തോഷിക്കാൻ കാരണം നൽകുന്നു, ഭൂമി അതിന്റെ വിളവു നൽകുന്നു, ലഭിച്ച സമൃദ്ധി ലോകത്തിന്റെ അതിരുകൾ വരെ എത്തുന്ന ഒരു സാക്ഷ്യമായി മാറുന്നു.

ജാതികൾഅനുഗ്രഹംന്യായംവിളവ്

1ദൈവം നമ്മോട് കൃപാലുവായിരിക്കുകയും നമ്മെ അനുഗ്രഹിക്കുകയും ചെയ്യട്ടെ, തിരുമുഖം നമ്മുടെമേൽ പ്രകാശിപ്പിക്കുകയും ചെയ്യട്ടെ— സേലാ.

2അങ്ങനെ അവിടത്തെ മാർഗം ഭൂതലത്തിലെങ്ങും അറിയപ്പെടട്ടെ, അവിടത്തെ രക്ഷ സകലരാഷ്ട്രങ്ങളിലും.

3ദൈവമേ, ജനതകൾ അങ്ങയെ സ്തുതിക്കട്ടെ; സകലജനതകളും അങ്ങയെ സ്തുതിക്കട്ടെ.

4രാഷ്ട്രങ്ങൾ ആഹ്ലാദത്തോടെ ആനന്ദഗീതം ആലപിക്കട്ടെ, കാരണം അങ്ങ് ജനതകളെ നീതിപൂർവം ഭരിക്കുകയും ഭൂമിയിലെ രാഷ്ട്രങ്ങളെ നയിക്കുകയും ചെയ്യുന്നു. സേലാ.

5ദൈവമേ, ജനതകൾ അങ്ങയെ സ്തുതിക്കട്ടെ; സകലജനതകളും അങ്ങയെ സ്തുതിക്കട്ടെ.

6അപ്പോൾ ഭൂമി അതിന്റെ വിളവ് നൽകുന്നു; ദൈവം, നമ്മുടെ ദൈവം, നമ്മെ അനുഗ്രഹിക്കും.

7അതേ, ദൈവം നമ്മെ അനുഗ്രഹിക്കും, അങ്ങനെ ഭൂമിയിലെ സകലജനതകളും അവിടത്തെ ഭയപ്പെടും.

‹ സങ്കീർത്തനങ്ങൾ 66 സങ്കീർത്തനങ്ങൾ 68 ›

Biblica® സ്വതന്ത്രം സമകാലിക മലയാളവിവർത്തനം — CC BY-SA 4.0. Where these translations come from.